1979 ஆம் ஆண்டின் 48 ஆம் இலக்க பயங்கரவாதத் தடுப்பு (தற்காலிக ஏற்பாடுகள்) சட்டத்தின் 27 ஆம் பிரிவின் கீழ் தடை செய்யப்பட்டுள்ள முஸ்லிம் அமைப்புக்களில், 5 அமைப்புக்களின் தடையை முற்றாக நீக்கி அரசாங்கம் விஷேட வர்த்தமானி அறிவித்தலை வெளியிட்டுள்ளது.
நேற்று ஜூலை 26 ஆம் திகதியிடப்பட்ட 2342/7 ஆம் இலக்க விஷேட வர்த்தமானி அறிவித்தல் ஊடாக இந்த அறிவிப்பை ஜனாதிபதி ரணில் விக்ரமசிங்க அறிவித்துள்ளார்.
அதன்படி, தெளஹீத் அமைப்புக்களாக அறியப்படும், ஐக்கிய தௌஹீத் (தௌஹீத்) ஜமாஅத் (யூ.டி.ஜே.), சிலோன் தௌஹீத் (தௌஹீத்) ஜமாஅத் (சி.டி.ஜே.), ஸ்ரீலங்கா தௌஹீத் (தௌஹீத்) ஜமாஅத் (எஸ்.எல்.டி.ஜே.), அகில இலங்கை தௌஹீத் (தௌஹீத்) ஜமாஅத் (ஏ.சி.டி.ஜே.), ஜம்மியதுல் அன்ஸாரி சுன்னதுல் மொஹமதியா (ஜே.ஏ.எஸ்.எம்.) ஆகியவற்றின் மீதான தடைகளை தளர்த்தவே தீர்மானிக்கப்பட்டுள்ளது.
தடைகளை நீக்க முடிவெடுக்க முன்னர், இதுவரை உயிர்த்த ஞாயிறு தாக்குதல் விவகாரத்தில் முன்னெடுக்கப்பட்ட விசாரணைகளின் சாராம்சம், சட்ட மா அதிபரின் ஆலோசனை உள்ளிட்டவற்றை பாதுகாப்பு அமைச்சு பெற்றுக்கொன்டுள்ளது. அத்துடன் ஜனாதிபதி ரணில் விக்ரமசிங்கவை சந்தித்த முஸ்லிம் சமூக பிரதிநிதிகளின் கோரிக்கையும் தடை நீக்கத்தில் தாக்கம் செலுத்தியுள்ளதாக அறிய முடிகின்றது.
முன்னதாக நாட்டின் சமாதானத்தை உறுதிப்படுத்தும் வகையில் தேசிய பாதுகாப்பு, பொதுமக்கள் ஒழுங்கு மற்றும் சட்டவாட்சியின் நலனில் அரசாங்கத்தின் முயற்சிகளை முன்னெடுப்பதற்காக அடிப்படைவாதத்துடன் தொடர்புடைய 11 அமைப்புகளை தடை செய்வதாக அதிவிசேட வர்த்தமானியை வெளியிட்டு அரசாங்கம் அறிவித்துள்ளது.
1979 ஆம் ஆண்டின் 48 ஆம் இலக்க பயங்கரவாதத் தடுப்பு (தற்காலிக ஏற்பாடுகள்) சட்டத்தின் 27 ஆம் பிரிவின் கீழ் கடந்த 2021 ஏப்ரல் 13 ஆம் திகதி வெளியிடப்பட்ட 2223/3 ஆம் இலக்க வர்த்தமானி அறிவித்தலுக்கு அமைய 11 முஸ்லிம் அமைப்புக்களுக்கு தடை இந்த விதிக்கப்பட்டது.
1979 ஆம் ஆண்டின் 48 ஆம் இலக்க பயங்கரவாதத் தடுப்பு (தற்காலிக ஏற்பாடுகள்) சட்டத்தின் 27 ஆம் பிரிவின் கீழ் 2021 ஆம் ஆண்டின் 1 ஆம் இலக்க ஒழுங்கு விதிகளுக்கமைய குறிப்பிட்ட 11 அமைப்புகளும் தடை செய்யப்பட்டுள்ளதாக வர்த்தமானி அறிவித்தலில் சுட்டிக்காட்டப்பட்டுள்ளது.
இதற்கமைய பின்வரும் அமைப்புக்களுக்கு தடை விதிக்கப்பட்டுள்ளன.:
1. ஐக்கிய தௌஹீத் (தௌஹீத்) ஜமாஅத் (யூ.டி.ஜே.)
2. சிலோன் தௌஹீத் (தௌஹீத்) ஜமாஅத் (சி.டி.ஜே.)
3. ஸ்ரீலங்கா தௌஹீத் (தௌஹீத்) ஜமாஅத் (எஸ்.எல்.டி.ஜே.)
4. அகில இலங்கை தௌஹீத் (தௌஹீத்) ஜமாஅத் (ஏ.சி.டி.ஜே.)
5. ஜம்மியதுல் அன்ஸாரி சுன்னதுல் மொஹமதியா (ஜே.ஏ.எஸ்.எம்.) மறுபெயர் ஜம்மாஅத் அன்ஸாரிஸ் சுன்னதில் மொஹமதியா ஒழுங்கமைப்பு மறுபெயர் அகில இலங்கை ஜம் – ஈ – அது அன்ஸாரிஸ் சுன்னதில் மொஹம்மதியா மறுபெயர் அன்ஸாரிஸ் சுன்னதில் மொஹம்மதியா கழகம் மறுபெயர் ஜமாஅத் அன்ஸாரிஸ் சுன்னதில் மொஹம்மதியா
6. தாருல் அதர் மறுபெயர் ஜாமிஉல் அதர் பள்ளிவாசல் மறுபெயர் தாருல் அதர் குர் ஆன் மத்ரசா மறுபெயர் தாருல் அதர்அத்தபாவிய்யா
7. ஸ்ரீலங்கா இஸ்லாமிய மாணவர் இயக்கம் (எஸ்.எல்.ஐ.எஸ்.எம்.) மறுபெயர் ஜம்இய்யா
8. ஈராக் மற்றும் சிரியா இஸ்லாமிய அரசு (ஐ.எஸ்.ஐ.எஸ்.) மறுபெயர் அல் – தௌலா அல் – இஸ்லாமியா
9. அல்கைதா அமைப்பு
10. சேவ் த பேர்ள்ஸ் அமைப்பு மறுபெயர் சேவ் த பேர்ள் சங்கம்
11. சுப்பர் முஸ்லிம் அமைப்பு
இலங்கையில் அல்லது இலங்கைக்கு வெளியில் குறித்த அமைப்புகளில்,
(அ) உறுப்பினரொருவராக அல்லது அங்கத்தவரொருவராக இருத்தலாகாது,
(ஆ) அதற்குத் தலைமைத்துவம் அளித்தலாகாது,
(இ) சீருடையை, உடையை, சின்னத்தை, தனிக்குறியை அல்லது கொடியை அணிதலோ, வெளிக்காட்டுதலோ, ஏந்துதலோஅல்லது உடைமையில் வைத்திருத்தலோ ஆகாது,
(ஈ) கூட்டமொன்றை அழைத்தலோ, கூட்டுதலோ, நடாத்துதலோ அல்லது அதில் பங்குபற்றுதலோ ஆகாது,
(உ) உறுப்பாண்மையைப் பெறுதலோ அல்லது அதைச் சேருதலோ ஆகாது,
(ஊ) ஓர் உறுப்பினருக்கு, அங்கத்தவருக்கு அல்லது வேறெவரேனும் இணையாளருக்குப் புகலிடமளித்தலோ, அவரை மறைத்துவைத்தலோ அல்லது அவருக்கு உதவுதலோ ஆகாது,
(எ) மேம்பாட்டுக்கு உதவுதலோ, அதனை ஊக்குவித்தலோ, அதற்கு ஆதரவளித்தலோ, மதியுரையளித்தலோ, உதவுதலோ அல்லது அதன் சார்பில் செயலாற்றுதலோ ஆகாது,
(ஏ) ஏதேனும் செயற்பாட்டை அல்லது நிகழ்வை ஒழுங்குபடுத்தலோஅல்லது அதில் பங்குபற்றுதலோ ஆகாது,
(ஐ) பணத்தை அல்லது பொருட்களை நன்கொடையளித்தலோ அல்லது உதவுதொகையளித்தலோ ஆகாது,
(ஒ) அதற்காக அல்லது அதன் பொருட்களைப் பெறுதலோ, களஞ்சியப்படுத்தலோ, இடம்பெயர்த்தலோ, உடைமையில் வைத்திருத்தலோ அல்லது விநியோகித்தலோ ஆகாது,
(ஓ) நோக்கத்தை ஊக்குவித்தலோ அல்லது பிரதிநிதித்துவப்படுத்தலோ ஆகாது,
(ஒள) அதனோடு ஏதேனும் கொடுக்கல் வாங்கலில் ஈடுபடுதலாகாது, அல்லது
(க) அதன் சார்பில் தகவலைப் பரப்புவித்தலாகாது,
என தடைச் செய்யும் வர்த்தமானியில் கூறப்பட்டுள்ளது.
முன்னதாக குறித்த 11 அமைப்புக்களில் 6 அமைப்புக்கள் தம்மீதான தடையை ஆட்சேபித்து அடிப்படை உரிமை மீறல் மனுக்களை உயர் நீதிமன்றில் தாக்கல் செய்த நிலையில், தடையை மீள் பரிசீலனை செய்யுமாறு பாதுகாப்பு அமைச்சிடமும் கோரியிருந்தன.
பாதுகாப்பு இராஜாங்க அமைச்சர், பாதுகாப்பு செயலர் ஜெனரால் கமல் குணரத்ன, பாதுகாப்பு படைகளின் தலைமை அதிகாரி ஜெனரால் சவேந்ர சில்வா, தேசிய உளவுச் சேவை பணிப்பாளர் மேஜர் ஜெனரால் சுரேஷ் சலே, பொலிஸ் மா அதிபர் மற்றும் சட்ட மா அதிபர் ஆகியோர் உள்ளிட்டோர் அம்மனுக்களில் பிரதிவாதிகளாக பெயரிடப்பட்டுள்ளனர்.
அரசியலமைப்பின்17 மற்றும் 126 ஆவது உறுப்புரைக்கு அமைய இவ்வடிப்படை உரிமை மீறல் மனுக்கள் தாக்கல் செய்யப்பட்டுள்ள நிலையில், அரசியலமைப்பின் 3 ஆவது அத்தியாயத்தின் கீழ் உள்ள 10,12(1),12(2), 14(அ),(ஆ),(இ),(உ),(ஊ) ஆகிய உறுப்புரைகள் ஊடாக வழங்கப்பட்டுள்ள அடிப்படை உரிமைகள், தமது அமைப்பு உள்ளிட்ட 11 அமைப்புக்களை தடைச் செய்யும் வர்த்தமானி அறிவித்தல் ஊடாக மீறப்பட்டுள்ளதாக மனுதாரர்கள் அடிப்படை உரிமை மீறல் மனு ஊடாக சுட்டிக்காட்டியுள்ளனர்.
அதாவது, சிந்தனை, மனசாட்சி, மத சுதந்திரம் மீறப்பட்டுள்ளதாகவும், சமத்துவதற்கான உரிமை மீறப்பட்டுள்ளதாகவும், பேச்சு சுதந்திரம், ஒன்று கூடுவதற்கான ஒழுங்கமைப்பதற்கான சுதந்திரங்கள், மீறப்பட்டுளதா மனுதாரர்கள் குறிப்பிட்டுள்ளனர். இம்மனுக்கள் அனைத்தும் உயர் நீதிமன்றால் விசாரணைக்கு ஏற்கப்பட்டு நிலுவையில் உள்ளன.
இவ்வாறான பின்னணியிலேயே, 2021 ஏப்ரல் 13 ஆம் திகதி வெளியிடப்பட்ட 2223/3 ஆம் இலக்க வர்த்தமானி அறிவித்தலில் 1,2,3,4,5 என குறிப்பிடப்ப்ட்டுள்ள விடயங்களை அதிலிருந்த்து நீக்குவதாக புதிய வர்த்தமானியில் ஜனாதிபதி ரணில் விக்கிரமசிங்க அறிவித்துள்ளார்.
அதன் பிரகாரமே குறித்த 5 முஸ்லிம் அமைப்புக்கள் மீதான தடை நீங்கியுள்ளமை குறிப்பிடத்தக்கது.
