வீட்டை உடைத்து சொத்துக்களை கொள்ளையிட்டமை தொடர்பில் தேடப்பட்டு வந்த சந்தேகநபர் ஒருவர் ஐஸ் போதைப்பொருளுடன் நேற்று (21) கல்கிஸ்ஸை குற்றத் தடுப்பு பிரிவினரால் கைது செய்யப்பட்டுள்ளார்.
கல்கிஸ்ஸை – படோவிட்ட பாலத்திற்கு அருகாமையில் கல்கிஸ்ஸை குற்றத் தடுப்பு பிரிவின் அதிகாரிகள் குழுவினால் மேற்கொள்ளப்பட்ட சுற்றிவளைப்பின் போதே அவர் கைது செய்யப்பட்டுள்ளார்.சந்தேக நபர் படோவிட்ட பிரதேசத்தை சேர்ந்த 29 வயதுடையவர் எனவும், அவர் கைது செய்யப்பட்ட போது, 12 கிராம் 150 மில்லிகிராம் ஐஸ் போதைப்பொருளை வைத்திருந்ததாகவும் பொலிஸார் தெரிவித்துள்ளனர்.இந்த நபர் கடந்த 10ஆம் திகதி தெஹிவளை பொலிஸ் பிரிவிற்குட்பட்ட வீடொன்றில் புகுந்து மின் உபகரணங்கள் மற்றும் ஏனைய தளபாடங்களை சேதப்படுத்தி 12 இலட்சம் ரூபாவிற்கும் அதிகமான பெறுமதியான தங்க நகைகள் மற்றும் 04 கையடக்கத் தொலைபேசிகளை கொள்ளையிட்டதற்காக தேடப்பட்டு வந்த சந்தேக நபர் ஆவார்.
மேற்படி குற்றச் செயல்களுக்கு சந்தேகநபர் பயன்படுத்திய வாள் ஒன்றையும் பொலிஸார் கண்டுபிடித்துள்ளனர்.
