ஒரே பிறந்தநாளை கொண்ட பாகிஸ்தான் குடும்பம் கின்னஸ் சாதனை படைத்தது!

_{(அமிர்தப்பிரியா சிவலிங்கம்)}

பாகிஸ்தானின் லர்கானா பகுதியை சேர்ந்த குடும்பம் ஒன்று கின்னஸ் சாதனை
படைத்துள்ளது.

அமீர் அலி என்பவரும் அவரது மனைவி குதேஜா ஆகியோருக்கு 19 முதல் 30 வயதுடைய 7 குழந்தைகள் உள்ளனர். இதில் பெண் இரட்டையர்கள், ஆண் இரட்டையர்களும் அடங்குவர். இவர்கள் 9 பேருக்குமே பிறந்த திகதி ஒரே நாளாகும். அதாவது ஓகஸ்ட் முதலாம் திகதி அன்று இந்த 9 பேருமே பிறந்துள்ளனர்.

இந்நிலையில்இந்த விடயம் இது உலக சாதனையாக மாறி இருப்பதாக கின்னஸ் நிறுவனம் குறிப்பிட்டுள்ளது.

இதற்கு முன்பு அமெரிக்காவில் கம்மின்ஸ் என்பவரது குடும்பத்தை சேர்ந்த 5 குழந்தைகள் இந்த சாதனையை தம்வசம் வைத்திருந்தனர். அவர்கள் பெப்ரவரி 20ஆம் திகதி பிறந்தநாளை கொண்டாடி வருகின்றனர். தற்போது அந்த சாதனை முறியடிக்கப்பட்டுள்ளது.

அமீர் அலி – குதேஜாவின் திருமண நாளும் ஓகஸ்ட் முதலாம் திகதி என்பது சிறப்பம்சமாகும். இவர்கள் 1991ஆம் ஆண்டு தங்களது பிறந்தநாள் அன்று திருமணம் செய்து கொண்டனர்.