சமூக ஊடகங்களின் பாவனை சிறுவர் தற்கொலைகள் அதிகரிப்பதற்கு வழிவகுத்துள்ளதாக இலங்கை சிவில் வைத்தியர்கள் சங்கம் தெரிவித்துள்ளது.
கடந்த ஆண்டில் 200இற்கும் மேற்பட்ட குழந்தைகள் இவ்வாறு உயிர்மாய்த்துக் கொண்ட சம்பவங்கள் பதிவாகியுள்ளதாக அதன் தலைவர் விசேட வைத்தியர் கபில ஜயரத்ன தெரிவித்தார்.
2022 ஆம் ஆண்டில், 18 வயதுக்குட்பட்ட 133 சிறுவர்கள் உயிர்மாய்த்துக் கொண்டதுடன், அதிகாரப்பூர்வமற்ற தரவுகளின் படி, கடந்த 2024 ஆம் ஆண்டு 270 சிறுவர்கள் உயிர்மாய்த்துக் கொண்டதாக தெரிவிக்கப்படுகிறது.
இவை அனைத்திற்கும் பல்வேறு காரணங்கள் உள்ள நிலையில், சமூக ஊடகங்களை தடை செய்வதே இவற்றை தடுக்க எம்மால் இயன்ற முதலாவது செயற்பாடாகும் எனவும் இலங்கை சிவில் வைத்தியர்கள் சங்கத்தின் தலைவர் குறிப்பிட்டுள்ளார்.
ஒரு நாடாக என்ன செய்ய வேண்டும் என்பது குறித்த தகவல்கள் சேகரிக்கப்பட்டுள்ளதுடன், அடுத்த வாரம் அல்லது இரண்டு வாரங்களில் இது குறித்த தகவல்களை வெளியிட எதிர்பார்ப்பதாகவும் அவர் தெரிவித்தார்.
மேலும், குழந்தைகளுக்காக சமூக ஊடகங்களைப் பயன்படுத்துவதில் நன்மைகள் மற்றும் தீமைகள் இரண்டும் உள்ளதாகவும், இதை எவ்வாறு கட்டுப்படுத்துவது என்பது குறித்த பரிந்துரைகளை வழங்கலாம் என எதிர்பார்ப்பதாகவும் இலங்கை சிவில் வைத்தியர்கள் சங்கத்தின் தலைவர் வைத்தியர் கபில ஜயரத்ன தெரிவித்துள்ளார்.
