வங்கி அமைப்பு வீழ்ச்சியடைந்தால் சகல பணத்தையும் இழக்க நேரிடும் – நந்தலால் வீரசிங்க

_{(அமிர்தப்பிரியா சிவலிங்கம்)}

2038ஆம் ஆண்டுக்குள் ஊழியர்களின் வருங்கால வைப்பு நிதி 12 டிரில்லியனால் குறைக்கப்படும் என்ற அறிக்கையை மத்திய வங்கியின் ஆளுநர் நந்தலால் வீரசிங்க நிராகரித்துள்ளார்.

2038ஆம் ஆண்டு வரை 13.5 சதவீதம் பயனுள்ள வட்டி விகிதத்தை மாத்திரம் கணக்கிட்டு கணக்கீடு செய்யப்பட்டுள்ளதாக அவர் தெரிவித்துள்ளார்.

இவ்வளவு நீண்ட காலத்திற்கு அதிக உற்பத்தித்திறனை வழங்குவதற்கு, பணவீக்கம் 15-18 சதவீதத்துக்கு இடையில் இருக்க வேண்டும் என்றும் அவர் சுட்டிக்காட்டியுள்ளார்.

தற்போது வங்கியில் உள்ள பணத்தை பேணிக்காக்க வேண்டும் என்பதே பெரும்பான்மையினரின் கருத்து எனக்கூறிய அவர், அதுவரை வாழ்ந்தால் ஓய்வூதியத்தை காப்பாற்ற முடியும் எனவும் வங்கி அமைப்புக்கு ஆபத்து ஏற்பட்டால் மற்றும் வங்கி அமைப்பு வீழ்ச்சியடைந்தால், அனைவரும் தங்கள் வருங்கால வைப்பு நிதி உட்பட அனைத்து பணத்தையும் இழக்க நேரிடும் என்றும் அவர் தெரிவித்துள்ளார்.

இதன் காரணமாக, கடன் தேர்வுமுறையின் ஒரு மூலையை மாத்திரம் எடுத்து தவறாகப் புரிந்துகொள்வது தவறு என்றும், முழு செயல்முறையையும் ஆய்வு செய்ய வேண்டும் என்றும் அவர் வலியுறுத்தியுள்ளார்.

மத்திய வங்கியின் தலைமையகத்தில் நடைபெற்ற ஊடகவியலாளர் சந்திப்பின் போதே அவர் இதனைத் தெரிவித்துள்ளார்.