இலங்கையின் விளையாட்டுத் துறையில் புதிய எழுச்சியை ஏற்படுத்தியுள்ள ‘ஸ்ரீலங்கா பெடல் லீக்’ (SLPL), தனது இரண்டாவது பருவத்தை வரும் ஜூன் 19 முதல் 21 வரை கொழும்பில் நடத்தத் திட்டமிட்டுள்ளது.
பிராந்தியத்தில் வேகமாக வளர்ந்து வரும் ‘பெடல்’ (Padel) விளையாட்டுக்கான முறையான பிரான்ச்சைஸ் (Franchise) கட்டமைப்பை உருவாக்கும் நோக்கில், ‘ஈவென்ட்ரி ஸ்போர்ட்ஸ்’ (Eventistry Sports) நிறுவனம் இந்தத் தொடரை முன்னெடுத்துள்ளது.
இம்முறை சர்வதேச வீரர்களின் பங்கேற்பு மற்றும் மேம்படுத்தப்பட்ட ஒளிபரப்புத் தரத்துடன் இப்போட்டி நடைபெறவுள்ளது.
அணிகளின் விபரம் மற்றும் ஏல நடைமுறை :
இந்த ஆண்டு மொத்தம் எட்டு பிரான்ச்சைஸ் அணிகள் களமிறங்குகின்றன.
கடந்த முறையிருந்த ஆறு அணிகளுடன், ‘அஹங்காமா பாலர்ஸ்’ (Ahangama Ballers) மற்றும் ‘வெலிகம ஷார்க்ஸ்’ (Weligama Sharks) ஆகிய இரண்டு புதிய அணிகள் இணைந்துள்ளன.
நடப்பு சாம்பியனான ‘கொழும்பு ஏசஸ்’ தனது மகுடத்தைத் தக்கவைக்கப் போராடும் அதேவேளை, மற்ற அணிகளும் கடும் போட்டியை வழங்கத் தயாராகி வருகின்றன.
வீரர்களுக்கான ஏலம் ஏப்ரல் 24-ம் தேதி நடைபெறவுள்ளது. இம்முறை வீரர்களுக்கு எவ்விதப் பிரிவு கட்டுப்பாடுகளும் விதிக்கப்படாமல், உரிமையாளர்கள் தங்களுக்குத் தேவையான வீரர்களைத் தடையின்றித் தேர்வு செய்யும் வகையில் ஏல விதிமுறைகள் மாற்றப்பட்டுள்ளன.
வர்த்தகப் பங்காளர்களும் ஸ்பான்சர்களும் SLPL 2026 தொடரின் முதன்மை ஆதரவாளராக (Title Partner) ஸ்டாண்டர்ட் சார்ட்டர்ட் வங்கியின் (Standard Chartered Priority Banking) முன்னுரிமை வங்கிச் சேவை இணைந்துள்ளது. மேலும், ‘ஹட்ச்’ (Hutch) நிறுவனம் ‘பவர்டு பை’ (Powered By) பங்காளராகவும், ‘ஈ எப்எம்’ (E FM) உத்தியோகபூர்வ வானொலிப் பங்காளராகவும் செயல்படுகின்றன.
ரெட் புல், ஃபுட் ஸ்டுடியோ மற்றும் ஜெட்விங் போன்ற பல முன்னணி நிறுவனங்கள் பல்வேறு பிரிவுகளில் வர்த்தகப் பங்களிப்பை வழங்குகின்றன. இந்தத் தொடர் ‘பியோ டிவி’ (PEO TV) ஊடாக நாடு முழுவதும் நேரடி ஒளிபரப்பு செய்யப்படவுள்ளது.
நிர்வாகத்தின் இலக்கு மற்றும் சமூகப் பொறுப்பு “இலங்கையில் பிரான்ச்சைஸ் முறையிலான விளையாட்டுப் பரிணாம வளர்ச்சியில் இது ஒரு தீர்க்கமான நகர்வு” என லீக் பணிப்பாளர் ரின் விஜேரத்ன தெரிவித்துள்ளார். விளையாட்டுடன் சமூகப் பொறுப்பையும் இணைக்கும் விதமாக, ‘Navodhya’ மற்றும் ‘Justice for Animals’ ஆகிய அமைப்புகளுடன் இணைந்து சமூக நலத்திட்டங்களையும் இந்த லீக் முன்னெடுக்கவுள்ளது. ஆர்வமுள்ள உள்நாட்டு மற்றும் சர்வதேச வீரர்கள் slpadelleague.com என்ற இணையதளத்தில் ஏப்ரல் 14-ம் தேதி வரை தங்களைப் பதிவு செய்து கொள்ளலாம்.
